A NOSA ROSALÍA
Hoxe, 23 de febreiro conmemoramos o día de Rosalía de Castro. Este ano queremos resaltar o seu amor polas paisaxes galegas, dise dela que foi unha das grandes poetas da paisaxe, e así coa súa axuda animar ao noso alumnado a descubrir e coñecer mellor as herbas, plantas ou árbores que nos rodean, porque a mellor maneira de coidar o noso planeta é se primeiro descubrimos a súa beleza e aprendemos a apreciala e desfrutala para despois involucrarnos en preservala.
Para isto preparamos na biblioteca unha serie de actividades inspiradas no libro “Nasín cando as prantas nasen, O herbario de Rosalía de Castro” creado e publicado pola Fundación Rosalía de Castro, onde se recollen da súa obra todas as referencias a plantas ou flores concretas e termos xenéricos coma “Herbas do campo florido” ou “Herbiñas do campo santo”, ilustradas todas elas con fermosas fotografías. Por suposto entre as flores máis mencionadas sobresae a rosa, que triplica en número a segunda planta máis presente, o carballo. Así atopamos como agasaio un esgallo de roseira para plantar e coidar en cada aula, e máis adiante transplantar nas xardineiras que estamos a crear no patio. Tamén hai uns exemplares dalgunhas plantas e follas de árbores metidos dentro das caixas parlantes para que o alumnado poida experimentar con tódolos seus sentidos, e crear algúns versos expresando o que lles evocan.
Con todas as creacións poéticas faremos unha exposición no corredor de acceso á biblio, que mostraremos como resultado final.
Comentarios