25N: "MARISQUIÑO OU... MÁIS RIQUIÑO"

 Con motivo do 25 de novembro, Día Internacional contra a Violencia de Xénero, a Biblioteca  acompañou a conmemoración cunha exposición de recursos e materiais relacionados coa igualdade, a corresponsabilidade e a prevención das violencias machistas.

Ademais, e en colaboración co Equipo de Convivencia e Benestar, desenvolveuse no centro unha proposta de obradoiros interdisciplinares interciclo vinculados ao noso PDI “Estamos Aquí”, centrado este ano no ODS 14: Vida submarina. Así naceu “Marisquiño ou… máis riquiño”, unha iniciativa que une educación afectivo-social e conciencia ambiental a través dun fío común: coidar o planeta e coidarnos entre nós, educando na igualdade dende o mar que nos une.

Os nenos e nenas de Infantil traballaron en cinco grupos mesturados entre as catro aulas, desenvolvendo actividades manipulativas, sensoriais e simbólicas, sempre desde a linguaxe do xogo e a experimentación:

Pescando mensaxes contra a violencia machista: Coas mesas sensoriais convertidas nun mar, pescaron peixes con pictogramas e clasificaron se representaban imaxes positivas ou negativas. Un exercicio para identificar emocións e condutas.

Limpando o mar de violencias: recreouse unha praia na que recolleron “lixo” simbólico. Despois analizaron as mensaxes que levaban, comprendendo que, igual que o mar, tamén as relacións se poden “ensuciar” e deben coidarse.

Redes de bo trato: Cada neno e nena recibiu unha cartolina en forma de gota, na que estamparon ou escribiron palabras de bo trato, verbalizando afectos e comportamentos positivos.

Marisquiño ou… máis riquiño: Con pezas soltas, realizaron unha recreación da mascota da proposta, reforzando a idea central de ser “máis riquiños” nas relacións e co entorno.

En Primaria, adaptouse a proposta ao nivel de cada ciclo, mantendo a mesma estructura que na etapa de EI:

Pescando mensaxes contra a violencia machista: A través de diferentes dinámicas (canas imantadas, ganapáns ou clasificación de peixes con textos e imaxes), o alumnado identificou mensaxes igualitarias e machistas, decidindo cales conservar e cales “expulsar” do mar das relacións.

Limpando o mar de violencias: Nos areeiros do cole, recolleron residuos que representaban comportamentos negativos. Leron as mensaxes e reflexionaron antes de depositalos no contedor adecuado, relacionando violencia machista e contaminación ambiental.

As menciñas da igualdade: Cada “residuo emocional” (celos, control, medo, burla…) foi transformado nunha menciña positiva (confianza, respecto, valentía, recoñecemento…). Unha actividade de educación emocional que reforza o bo trato.

Redes de bo trato: Por parellas, elaboraron animais mariños (estrela, balea ou centola, segundo o ciclo) con palabras e eslogans pola igualdade. Logo, colocáronos nunha gran rede común, símbolo da forza colectiva para construír convivencia.

“Marisquiño ou… máis riquiño” é unha proposta que nos lembra que a igualdade tamén se educa, se constrúe e se aprende día a día, sempre da man da comunidade educativa.