MES DA CIENCIA EN GALEGO: CIENCIA E SAÚDE NA MESA

Este mes de novembro conmemoramos o mes da ciencia en galego, permitíndonos mergullarnos na ciencia coa nosa lingua como protagonista. Durante varias semanas, o alumnado participou en diversos experimentos que conectaron a ciencia coa alimentación saudable, aliñándose co noso Proxecto Documental Integrado.

Así, levamos a cabo tres experimentos que non só espertaron a curiosidade científica, senón que tamén promoveron reflexións sobre os alimentos que consumimos a diario. Estes foron os nosos experimentos:

O ferro nos cereais: O alumnado descubriu como é posible extraer pequenas partículas de ferro dos cereais usando un simple imán. Este experimento puxo en valor a importancia deste mineral na nosa dieta e a súa presenza en produtos que consumimos habitualmente.

O azucre nos refrescos: A través desta práctica, observamos a cantidade de azucre oculto en diferentes bebidas azucradas, visualizando o impacto que estas poden ter na nosa saúde. 

Froitas condutoras e tecnoloxía con Makey Makey: o alumnado voluntario da biblioteca preparou este experimento relacionando alimentación saudable, ciencia e tecnoloxía, demostrando como certas froitas poden ser conductoras. Conectámolas a unha placa Makey Makey, transformándoas en mensaxes reflexivas.

Con esta conmemoración, queremos reivindicar que a nosa lingua é tan válida como calquera outra transmitindo os coñecementos científicos. Así que xa sabedes, a ciencia en galego sabe mellor!

Aquí vos deixamos un Podcast onde o noso alumnado voluntario explica moi ben todos os experimentos realizados.